Boodskap 13 Januarie 2019

Boodskap 13 Januarie 2019

Matteus 13:1-9; 18-23

Dit is altyd wonderlik om goeie nuus te hoor! Matteus 13 nooi ons om na Goeie Nuus te luister in die woorde: “wie ore het, moet luister.”

Matteus word beskryf as die evangelie van Jesus. Die woord evangelie beteken goeie of blye boodskap, dus Goeie Nuus. Die Goeie Nuus is God se liefde wat in Jesus verskyn. Die Goeie Nuus is Jesus se geboorte, Sy lewe en bediening, Sy kruisiging, Sy opstanding, Sy verskyning in ‘n opstandingsliggaam, Sy Gees wat in mense leef, Sy wederkoms. Dit is die Goeie Nuus dat Jesus die Here is en regeer wat al die verhoudings tussen God, myself, mense en die omgewing kom herstel. In Matteus se woorde, dit is die “koninkryk van die hemel”.

Jesus vertel in Matteus ‘n hele paar gelykenisse om die Goeie Nuus van die koninkryk van die hemel te verduidelik. In Matteus 13 word die gelykenis van die saaier vertel. Die saad verwys na die Goeie Nuus van Jesus en die woord van die koninkryk. Sommige verwys eerder daarna as die gelykenis van die grond wat dui op die gemengde ontvangs van Jesus/Goeie Nuus/koninkryk.

Soms val die saad op die voetpad en word deur voëls opgepik. Soms val die saad op ‘n klipperige bodem waar dit ontkiem maar nie diep wortel skiet nie en na ʼn ruk tot niks kom. Soms val die saad saam met onkruid wat later verstrik raak en geen vrug lewer. Soms val die saad op goeie grond, waar dit ontkiem, groei, vrug dra en ‘n groot oes inbring. Die oes is Goeie Nuus!

Hierdie gelykenis troos ons met Goeie Nuus maar daag ons ook uit met die Goeie Nuus. Dit vertel:

· Daar is Goeie Nuus.
· Dra die Goeie Nuus in jouself.
· Dra die Goeie Nuus na ander.

Ons is die saailand wat ook ingetrek word by die saaiproses, om self te saai. Die gelykenis bemoedig ons om nie moedeloos te word as dit nie orals ontkiem, groei of vrug dra nie. Die saaier in die gelykenis saai, dalk selfs morsig, orals, omdat dit lewe wil gee!

Ds Karlien van Wyk